سەرۆکێ زانکۆیا نەورۆز ل گەل زانکۆیا میری کوری یا پۆلەندی رێککەفتننامەیەکا ئەکادیمی یا گرنگ ئیمزا دکەت

د سەرەدانەکێدا بۆ وەلاتێ پۆلەندا، سەرۆکێ زانکۆیا نەورۆز پرۆفیسۆر دکتۆر عەبدولوەهاب خالد مووسا ب هەڤالینیا نوینەرێ حکوومەتا هەرێما کوردستانێ بەرێز زیاد رەئووف رێککەفتنامەیەکا ئەکادیمی یا فەرمی دگەل زانکۆیا ماری کوری یا پۆلەندی ل باژێرێ لۆبلێن ئیمزا کر. د ڤێ سەرەدانێدا، کو ل رۆژا ٦\٧\٢٠٢٢ هاتە ئەنجامدان، پرۆفیسۆر دکتۆر رادۆسواف دوبرۆڤۆلسکی (سەرۆکێ زانکۆیا ماری کوری)، پرۆفسۆر دکتۆر ڤیسلاڤ گروسزێکی (هاریکارێ سەرۆکێ زانکۆیێ بۆ کاروبارێن زانستی و هەڤکاریێن نێڤدەولەتی)، د. ئەڤەلینا پاناس (وەکیلا زانکۆیێ بۆ نێڤدەولەتیکرنا خواندنێ)، بەرێز دیانا شچێپانسکا (رێڤەبەرا سەنتەرێ هەڤکاریێن نێڤدەولەتی ب وەکالەت) ب گەرمی پێشوازی ل شاندێ زانکۆیا نەورۆز و نوینەریا حکوومەتا هەرێما کوردستانێ کر. د کۆمبوونەکێدا ب مەرەما ئیمزاکرنا رێککەفتنامەیەکا ئەکادیمی ل ناڤبەرا هەردو زانکۆیێن نەورۆز و ماری کوری دا، سەرۆکێن هەردو زانکۆیان، دوپاتی ل سەر ڤان مژارێن سەرەکی د ناڤبەرا هەردو لایاندا کر، کو دەلیڤەیکا زێرین بۆ قوتابی و مامۆستایێن زانکۆیا نەورۆز ل گەل زانکۆیێن ئوروپی ڤەبیت:

- دیتنا دەرفەتێن گونجای ژبۆ سەرەدان و بەشداریا مامۆستا و قوتابی و لێکۆلەران ل دویڤ پێدڤیێ د ناڤبەرا کولیژ و بەشێن زانستیێن هەردو زانکۆیاندا ب مەرەما پەیداکرنا سەربۆر و شەهرەزایێن پێدڤی.
- دەرفەت و هاریکاریا زانکۆیا ماری کوری بۆ زانکۆیا نەورۆز د بوارێ پەیڕەوکرنا سیستەمێ بۆلۆنا پروسێس ل دویڤ مێتۆد و ستاندەردێن جیهانی.
- دیتنا دەرفەتان ژ لایێ زانکۆیا ماری کوریڤە بۆ زانکۆیا نەورۆز کو ل سالا ٢٠٢٣ زانکۆیا نەورۆز ببیتە ئەندام ل گەل زانکۆیێن ئەورۆپی د بەرنامێ ئیراسمۆس پڵاس و چەند پرۆگرامێن دیتردا.
- پشتی ئەڤ رێککەفتنامەیا فەرمی د ناڤبەرا هەردو سەرۆکێن زاکۆیاندا هاتیە ئیمزاکرن، دێ کولیژێن پەیوەندارێن هەردو زانکۆیان هێنە راسپاردن کو هەر یەک ژ وان ب رەنگەکێ ئێکسەر و ل سەر ئاستێ خۆ رێکەفتنێن تایبەت ل دویڤ پسپۆریێ د ناڤبەرا خۆدا ئیمزا بکەن، دا ئێکسەر هەر کولیژ و بەشەکێ زانستی ب ڕێکا تیمێن خۆ یێن پسپۆر دەستبکاربن.
- گرنگیەکا تایبەت ب بەشێن کومپیۆتەر و زانیاریێن تێکنولۆجی (ئای تی) بهێتەدان.

هەر د پەراوێزا ڤێ سەرەدانێدا، شاندێ زانکۆیا نەورۆز ل گەل نوینەرێ حکوومەتا کوردستانێ و وەکیلا سەرۆکێ زانکۆیا ماری کوری دکتۆر ئێڤیلینا پاناس سەرەدانا ناڤەندا پێشوازیێ کر کو چاوا زانکۆیا کوری میری سەرەدەریێ ل گەل قوتابیێن بیانی دکەت، و پاشی شاندی سەرەدانا تاقیگەهێن ئینستیتیوتا زانستێن کۆمپیۆتەری کرن و د ڤی چارچووڤەیدا، یەکەم تێکەلیێن لێکۆلینان ل گەل مامۆستایێن وان ئەنجامدان.
هەژی گۆتنێ یە، ل رۆژا سێشەمبی رێکەفتی ٥-٧ -٢٠٢٢ شاندێ زانکۆیا نەورۆز، ب سەرۆکاتیا پ. د. عەبدولوەهاب خالد مووسا، ل گەل نوینەرێ پشکا زانستێن سیاسی ژ کولیژا یاسا و رامیاری مامۆستا هەڤند ئیبراهیم، سەرەدانا نوینەراتیا حکوومەتا هەرێما کوردستانێ ل باژێرێ وارشۆ کر، کو ژ لایێ بەرێز زیاد رەئووف نوینەرێ حکوومەتا هەرێما کوردستانێ ل وەلاتێ پۆلەندا هاتنە پێشوازیکرن. هەر د وارێ درستکرنا پرێن ئەکادیمی دناڤبەرا زانکۆیا نەورۆز و زانکۆیێن پۆلەندیدا، بەرێز نوینەرێ حکوومەتا هەرێمێ رۆلەکێ هاریکار و بەرچاڤ د لێکنێزیکرن و ئیمزاکرنا ڤان رێککەفتنامەیان دا هەبوو.

وێنە: بارتۆز پرۆل

بەڵاڤ بکە :