ب هەلکەفتا 8 ئادارێ ڕۆژا جیهانیا ژنان، یانەیا نڤێسینێ ل زانکۆیا نەورۆز ئێکەمین چالاکیا خۆ ب هەڤکاری ل گەل پشکا کوردناسیێ ل کۆلیژا زمان د سەقایەکێ بهاریدا گێڕا.
پشتی سەرۆکا یانەیێ، پەیڤین نسرەت، بخێرهاتنا مامۆستا و قوتابیێن زانکۆیا نەورۆز کری، د. محەمەدعەلى یاسین تاها هاریکارێ سەرۆکێ زانکۆیێ و ئەندامێ یانەیا نڤێسینێ پەیڤەک پێشکێش کر، تێدا بەحسێ 8 ئادارێ و بزاڤێن ژنان ل سەرانسەرى جیهانێ کر و ل سەر گرنگیا باوەریبخۆبوونا ژنا کورد و شیانێن وێ راوەستیا. هەروەسا، ئاماژە ب یانەیا نڤێسینێ یا زانکۆیێ دا و چالاکیێن گرێداى وارێ نڤێسینێ و پشتەڤانیا خۆ بۆ حەزکریێن نڤێسینێ دیار کر.
ل دویڤدا، د. یاسرێ حەسەنى، مامۆستایێ کۆلیژا زمان سمینارەکێ کورت ل دۆر پەرتووکا خۆ یا هەڤپشک ل گەل دو مامۆستایێن زانکۆیا ئێکستەر پێشکێش کر، کو ب ناڤونیشانێن Women's Voices from Kurdistan: A Selection of Kurdish Poetry (دەنگێ ژنان ژ کوردستانێ ـ کۆمەکا هلبەژارتی ژ هەلبەستێن کوردی) بوو. تێدا بەحسی هەلبەستا ژنێن کورد کر، کو پشتی بووینە ئینگلیزی بووینە جهێ سەرنجا هندەک سازیێن بیانی. پاشى، هندەک ئەندامێن کچ یێن یانەیا نڤێسینێ، مزگین عەبدولخالق، بەناز نازم، هودا مەسعوود و پەیڤین نسرەت، کو هەر قوتابیێن زانکۆیا نەورۆز بوون، ب کورتى پەیامێن تایبەت ب هەلکەفتا ڕۆژا جیهانیا ژنان خواندن. ل دووماهیا ڕێورەسمان، قوتابى و مامۆستا و فەرمانبەرێن کچ و خانمان؛ هەست و دەربڕینێن خۆ ب ئاوایێ نڤێسینێ ل سەر تابلۆیەکێ دیارکرن.