کۆلیژا یاسا و زانستێن سیاسی، ئێک ژ کۆلیژێن دەستپێکییێن دامەزراندنا زانکۆیا نەورۆز بوو. هەروەسا پشکا ئێکێ بوو ل دەمێ ناڤێ زانکۆیا نەورۆز ـ کۆلیژا دهۆک یا زانکۆ ـ ل سالا 2004-2005 ل پارێزگەها دهۆکێ هاتییە دامەزراندن. پشکا یاسایێ ئێکەم پشکا زانستى ل کۆلیژا دهۆک یا زانکۆ بوو، پشتى ئەڤ کۆلیژەیە هاتییە گوهۆڕین و بوویە زانکۆ ب ئاوایەکێ فەرمى ل سالا 2009 و ل ژێر ناڤێ (زانکۆیا نەورۆز) کولیژا یاسا و ڕامیاری بوویە ئێک ژ کۆلیژێن سەرەکییێن پێکهاتێ زانکۆیێ. کۆلیژا ناڤبرى ژ دوو پشکان پێکدهێت، ئەو ژى پشکا یاسایێ و پشکا زانستێن سیاسى. کۆلیژ ب هەردوو پشکێن خۆڤە سالانە ژمارەیەکا قوتابییان ل دویڤ ڕێنمایێن وەزارەتا خواندنا بلند و ڤەکۆلینێن زانستى ل حکومەتا هەرێما کوردستانێ وەردگریت.
ئارمانجا سەرەکییا کۆلیژێ، بهێزکرنا لایەنێ زانستى و پراکتیکییێ قوتابییێن یاسایێ ب ڕێکا کۆمکرنا تێگەهێن تیۆرى و پێڕابوونێن یاسایى یێن پراکتیکییە. زێدەبارى فێرکرنا قوتابى ل سەر شڕۆڤە و چارەسەرکرنا ئاریشەیان ل دەمێ کارێ پارێزەرییێ دکەت. ژ لایەکێ دى کۆلیژا ناڤبرى کارى ل سەر دامەزراندنا نڤێسینگەهەکا ڕاوێژکارى ژ بۆ بدەستڤەهینانا چەندین ئارمانجان، وەکو پێشکێشکرنا ڕاوێژکارییا یاسایى بۆ تاکەکەس و دەزگەهێن جودا ب بهایەکێ گونجاى و ڕێکخستى دکەت.
هەروەسا کۆلیژ کارێ ل هەڤگوهارتنا شارەزاییێ ل گەل نڤێسینگەهێن وەکهەڤ ل هەرێما کوردستانێ و دەرڤەى هەرێمێ دکەت. کۆلیژا یاسا و زانستێن سیاسی، کۆڤارەکا زانستى یا تایبەت هەیە و گۆتارێن مامۆستا و کەسێن چالاکڤان تێدا دهێنە بەلاڤکرن. ل دووماهییێ دبێژین، کۆلیژ ل سەر کار و چالاکییێن خوە ژ پێخەمەت بدەستڤەهینانا ئارمانجێن زانکۆیێ د ناڤ هەمى تەخ و چینێن جڤاکیدا یا بەردەوامە.

پ. هـ. د. دلشاد عەبدولرەحمان يوسف

ڕاگرێ کۆلیژا یاسا و زانستێن سیاسی

بەڵاڤ بکە :