زانکۆیا نەورۆز ئاهەنگا دەرچوونێ بۆ 775 قوتابیان گێرا

ب ئامادەبوونا رێزدار پارێزگارێ دهۆکێ، د. عەلی تەتەر، زانکۆیا نەورۆز ئاهەنگا دەرچوونێ یا گەڕا شازدێ بۆ سالا خواندنێ (2021-2022)ێ گێرا، کو تێدا 775 قوتابی ژ پشکێن زانستیێن جوداجودا دەرچوون. د ڤێ ئاهەنگێدا، کو چەندین کەسایەتىێن حکومى، پەرلەمانتار، مێهڤانێن تایبەت، ڕێڤەبەرێن دامودەزگەهان و دایبابێن دەرچوویان ئامادەببوون، سەرۆکێ زانکۆیێ پ. د. عەبدولوەهاب خالد مووسا پەیڤەک پێشکێشکر. تێدا، ئاماژە ب وەرار و پێشکەفتنا زانکۆیێ دا، د وارێن زانستیدا و پێشڤەچوونا وێ ل سەر ئاستێ زانکۆیێن تایبەت و حکوومی، ل گەل ئاماژەدانێ ب پێشڤەچوونا زانکۆیێ ل دویڤ رێزبەندیێن نێڤدەولەتی و سیستەمکرنا زانکۆیێ د وارێن کارگێری و داراییدا و ئاڤاکرنا ژێرخانەیەکا موکوم بۆ پاشەرۆژێ. ل دویڤرا، پەیڤا وەزارەتا خواندنا بلند و ڤەکۆلینێن زانستی ژ لایێ بەرێز د. سەباح ئیبراهیم وەیس، راوێژکارێ وەزیری، هاتە خواندن و پاشی پەیڤا قوتابیێن دەرچوویی ژ لایێ لاڤا عەبدولوەحید هاتە پێشکێشکرن، کو ژ قوتابیێن دەرچوویێن کولیژا ئەندازیارییە. پشتی قوتابیان باوەرنامەیێن دەرچوونێ وەرگرتین و ب دووماهیکهاتنا رێورەسمان، ئاهەنگەکا کەیف و خۆشیێ ب پشکداریا چەندین هونەرمەندان هاتە رێکخستن.
رێورەسمێن ئاهەنگێ ژ لایێ پێشکێشکار وارڤین ئەمین، کو قوتابیا زانکۆیا نەورۆزە، هاتنە برێڤەبەرن. دهێتە زانین، ئەڤ سالە ئاهەنگا دەرچوونێ ل ئێڤاریا رۆژا چارشەمبێ ڕێکەفتى (20/7/2022) هاتە گێران، کو هەمان رۆژا دامەزراندنا زانکۆیا نەورۆزە.

Share :