ب پشتەڤانیا سەرۆکاتیا هەرێما کوردستانێ و ل ژێر درویشمێ "دهۆک ئیسماعیل تاهرى ژبیرناکەت" ل رۆژا سێشەمبێ رێکەفتى (25/1/2022) ل دەمژمێر (11:00) سپێدێ، زانکۆیا نەورۆز ب هەڤکارى ل گەل رێڤەبەریا گشتی یا رەوشەنبیرى و هونەرى/ دهۆک و رێکخراوا مەند بۆ یەکسانیێ رێورەسمێن ئیمزاکرنا هەشت پەرتووکێن خودێ ژێ رازى نڤیسکار و میدیاکار ئیسماعیل تاهر جانگیری گێران.
ل دەستپێکا ڕێورەسمان، چەندین پەیڤ ژ لایێ رێڤەبەریا گشتى یا رەوشەنبیرى و هونەرى ـ دهۆک، نوینەرێ سەرۆکاتیا هەرێما کوردستانێ، سەروکاتیا زانکۆیا نەورۆز ڤە هاتنە خواندن و تەکەزى ل سەر دلسۆزى و خەباتا نڤیسکارێ وەغەرکرى د بیاڤێن جودا یێن ژیانێدا هاتەکرن.
ل دویڤدا، ب پارچە موزیکەکێ ڕێورەسمێن پەنەلێ ب پێشکێشکرنا چار سمیناران ل سەر کار و بزاڤێن نڤیسکارێ وەغەرکرى دەستپێکرن و هەر پەنەلیستەکێ د دەمێ دەستنیشانکریدا سمینارا خۆ پێشکێشکر. هەروەسا د پارچە ڤیدیۆیەکێدا وەسەتا خودێ ژێ رازى هاتە نیشاندان و م. هەکار فندى ب کورتى ناڤەڕۆکا هەر 8 پەرتووکێن نوى چاپکرى دانیاسین.
ل دووماهیێ، پەرتووک ژ لایێ پارێزگەها دهۆکێ، زانکۆیا نەورۆز، ئێکەتیا نڤیسەرێن کورد، سەندیکایا رۆژنامەنڤیسان، سەندیکایا هونەرمەندان، ناڤەندا خانی و رێڤەبەریا گشتی یا پەرتووکخانەیان هاتنە ئیمزا و بەلاڤکرن.