ب خۆشحالیڤە رادگەهینین کو ئەکادیمیا بریتانى پرۆژەیەک ب زانکۆیا نەورۆز و زانکۆیا کوڤێنترى یا وەلاتێ بریتانیا د وارێ وورکشۆپ و راهێنانێن ئەکادیمى ل سەرانسەرى هەرێما کوردستانێ بەخشیە. هەژییە بێژین، کو پرۆژە دێ یێ تایبەت بیت ژ بۆ پشته‌ڤانیا ئەوان ئەکادیمیان یێن کارێ ڤەکۆلینێ د بیاڤێن ڤەکۆلینێن زانستێن مرۆڤایەتى و جڤاکیدا دكه‌ن، هەروەسا ئارمانجا سەرەکیا پرۆژەى بەرهەمئینانا ڤەکۆلینێن نوو و ئاستبلند ل سەر ئاستێ زانستیێ ڕۆژهەلاتا ناڤین و چاپگەهاندنا ئەوان د کۆڤارێن زانستى و جیهانیدایە.
ژ لایەکێ دیتر پرۆژەیێ ئەکادیمى دێ پشتەڤانیا کارێن ڤەکۆلەران و چێکرنا تۆڕەکا پەیوەندیان ل سەرانسەرى جیهانێ ژ بۆ دەمەکێ درێژ و ب پلان کەت. هەروەها نەخشەڕێیێ پرۆژەیى ئەڤەیە، کو ژمارەیەکا بەرچاڤ یا ئەکادیمى و شەهرەزایێن کورد ل سەر ئاستێ جیهانێ د پرۆژەیدا پشکداربکەت و مفا ژ ئەزموون و کارێن ئەوان بهێتەوەرگرتن.
ل دووماهیا وورکشۆپ و راهێنانان دێ ژمارەیەکا تایبەت یا کۆڤارا ئەکادیمى ب کار و ڤەکۆلینێن ئەوان ڤەکۆلەرێن پشکدارى د پرۆژەیدا کرین ب سەرپەرشتیا ڤەکۆلەرێن پسپۆر ب کوالێتیەکا بلند هێتە چاپکرن. گرنگە بێژین، کو د ناڤ پرۆژەیدا دێ ب تایبەتى بەحسێ چێکرن و پێشکێشکرنا پڕۆپۆزەلان و ب دەستڤەهینانا گرانتان هێتەکرن.
هێژاى ئاماژەپێدانێیە، کو ئەڤ پرۆژەیێ ئاستبلند ژ لایێ د. محەمەدعەلى یاسین تاها مامۆستا ل پشکا زانستێن سیاسى و د. بهار باشێر ژ زانکۆیا کوڤێنترى ب دەستڤەهاتییە.

https://www.thebritishacademy.ac.uk/projects/Building-Research-and-Publication-Capacity-of-Emerging-Scholars-in-the-Kurdistan-Region-of-Iraq/