مەزنترین ئاهەنگا دەرچوونێ ل زانکۆیا نەورۆز هاتە گێران

ب ئامادەبوونا ڕێزدار ئیدریس نێچیرڤان بارزانى، زانکۆیا نەورۆز ئێک ژ مەزنترین ئاهەنگێن دەرچوونێ بۆ هەردو گەڕێن (14 و 15) بۆ سالێن خواندنێ (2019-2020) و (2020-2021)ێ گێرا.
د ڤێ ئاهەنگێدا، کو چەندین کەسایەتىێن حکومى، پەرلەمانتار، مێهڤانێن تایبەت، ڕێڤەبەرێن دامودەزگەهان و دایبابێن دەرچوویان ئامادەببوون، سەرۆکێ زانکۆیێ پ. د. عەبدولوەهاب خالد مووسا پەیڤەک پێشکێشکر و ئاماژە ب دیرۆکا دامەزراندنا زانکۆیێ، قۆناغێن وەڕار و گەشەیێ، ڕێژەیا دەرچوویان ل گەل شیان و دەستهەلیا دەرچوویێن زانکۆیا نەورۆز دا.
هەروەسا مێڤانێ تایبەتێ ئاهەنگێ (د. غازى زێبارى) کو ژ وەلاتێ ئەمریکا قەستا ئاهەنگا مە کربوو، بەحسێ ئەزموون و سەربوورا ژیانا خۆ بۆ دەرچوویان ب مەبەستا هاندان و پشتەڤانیێ کر.
ژ لایەکێ دى و پشتى دەرچوویان کولاڤێن خوە بلندکرین و یاریێن ئاگرى هاتینە هاڤێتن، ئاهەنگەکا کەیف و خوەشیێ ب پشکداریا چەندین هونەرمەندان هاتە ڕێکخستن.
هەژییە بێژین، کو ئاهەنگا دەرچوونێ ل ڕۆژا ئێکشەمبێ ڕێکەفتى (24/10/2021) ل دەمژمێر (5:00) ئێڤارى ب بەرهەڤبوونا دەرچوویێن دو گەڕان (14 و 15) کو دەرچوویێن گەڕا (14) دبوونە (830) و دەرچوویێن گەڕا (15) دبوونە (828) دەرچووى هاتە گێران.

بەڵاڤ بکە :