ل زانکۆیا نەورۆز سەمپۆزیوومەک ب هەلکەفتا ڕۆژا جیهانییا زمانێ دایکێ هاتە گێڕان

ل ڕۆژا ئێکشەمبێ ڕێکەفتى (21/2/2021) ل دەمژمێر (11:00) سپێدێ، ڕاگرییا کۆلیژا زمان ل زانکۆیا نەورۆز سەمپۆزیوومەک ب هەلکەفتا ڕۆژا جیهانییا زمانێ دایکێ ل ژێر درویشمێ (پشتەڤانیکرنا فرەزمانییێ ژ بۆ پتر تەڤلیبوونا د ناڤ پەروەردە و جڤاکیدا) ب بەرهەڤبوونا مامۆستا و قوتابییێن زانکۆیێ و دەزگەهێن ڕاگەهاندنێ ل هۆلا کۆلیژا کارگێڕا و ئابوورى گێڕان.
هەژییە بێژین، کو سەمپۆزیووم ژ دوو تەوەرێن سەرەکى پێکدهات و د دەمێ دەستنیشانکریدا هاتە پێشکێشکرن، هەروەسا ئامادەبوویان دیتن و نێرینێن خوە دەربارەى بابەتێن دەبڕین.
ژ لایەکێ دى بەڕێز پرۆفیسۆر دکتۆر (عەبدولوەهاب خالد مووسا) سەرۆکێ زانکۆیێ ب هەمان هەلکەفت ب سمینارەکا ئۆنلاین پشکدارى د پەنەلێ سازییا زمانێ کوردى ل ڕۆژئاڤایێ کوردستانێدا کر، هەروەسا سپێدەهییا ئەڤرۆ ب ئاوایەکێ ڕاستەوخۆ د بەرنامەیەکێ تەلەڤزیۆنا کوردستان تیڤیدا بەشداربوو و دانوستاندن ل سەر چەندین پرسێن زمانى کرن، هەروەها ل ئێڤارییا هەمان ڕۆژ سەرۆکێ زانکۆیێ ب سمینارەکێ پشکدارى د پەنەلێ ئێکەتییا نڤیسەرێن کورد تایێ دهۆکێدا ل دۆر زمانى و جیهانبینییا ب زمانێ دایکێ کر.

Share :