ل ڕۆژا سێشەمبێ ڕێکەفتى (6/4/2021) ل دەمژمێر (11:00) سپێدێ، ڕێزدار دکتۆر (ئارام محەمەد قادر) وەزیرێ خواندنا بلند و ڤەکۆلینێن زانستى و شاندەکێ ل گەلدا سەرەدانا زانکۆیا نەورۆز کرن و ژ لایێ بەڕێز پرۆفیسۆر دکتۆر (عەبدولوەهاب خالد مووسا) سەرۆکێ زانکۆیا نەورۆز و ئەندامێن جڤاتا زانکۆیێڤە ب گەرمى هاتنە پێشەوازیکرن.
ل دەستپێکێ ڕێزدار سەرۆکێ زانکۆیێ بخێرهاتنا جەنابێ وەزیرى و شاندێ د گەلدا کر و خۆشحالییا خۆ ب سەرەدانا وان دەربڕى. ژ لایێ خۆڤە دکتۆر ئارام محەمەدى سوپاسییا ئەندامێن جڤاتێ و مامۆستایێن زانکۆیێ و پێشەوازییا وان کر.
پاشان سەرۆکێ زانکۆیێ ب تێر و تەسەلى بەحسێ زانکۆیا نەورۆز و قۆناغێن وەرار و خزمەتا زانستى، پلان و کار، پەیوەندییا بەردەوام ل گەل جڤاکى، پێگریکرن ب ڕێنمایێن زانستى، پێشئێخستنا ستافێ زانکۆیێ و پەرەپێدانا شیانێن قوتابییان کر.
ب ئەڤێ چەندێ جەنابێ وەزیرى دووبارە خۆشحالییا خۆ بۆ زانکۆیێ و بزاڤ و چالاکییێن وان یێن زانستى و ئەکادیمى دیاركر و گۆت: زانکۆیا نەورۆز ئاستەکێ زانستییێ بلند و کوالێتییەکا هەرەباش یا خواندنێ هەیە و ئێک ژ زانکۆیێن ئاستبەرزێن کوردستانێیە. هەروەسا ناڤەندەکا گرنگ یا پەروەردە و فێرکرنێ و پێشئێخستنا شیانێن جوداجودایە. ژ لایەکێ دی گۆت: ئاگەهدارییا مە ژ پلان و دونیابینییا نوو یا زانکۆیا نەورۆز و پرۆتۆکۆل و پێشڤەچوونێن وان یێن بەردەوام هەیە، دیسان ئەڤ چەندە و خەمخۆرییا ستافێ زانکۆیێ جهێ ڕێز و دەستخۆشییێیە. د بەردەوامییا ئاخڤتنا خۆدا وەزیرێ خواندنا بلند گۆت: زانکۆیا نەورۆز ئێک ژ زانکۆیێن تایبەت یێن خودان دیرۆکە و تایبەتمەندییا خۆ هەیە و هەڤپشکا سەرەکییا وەزارەتا خواندنا بلند و ڤەکۆلینێن زانستیییە.
هەژییە بێژین، پێشوازیکرن ل جەنابێ وەزیرى ب پەیرەوکرنا ڕێنمایێن ساخلەمى و خۆپارێزییێ ب باشترین ئاوا هاتەکرن.