ل ڕۆژا ئێکشەمبێ ڕێککەڤتى (4/10/2020) ل دەمژمێر (10:00) سپێدێ، ڕێزدار پرۆفیسۆر دکتۆر (عەبدولوەهاب خالد مووسا) سەرۆکێ زانکۆیا نەورۆز، دیدارەک تەلەڤزیۆنى ل دۆر دەستپێکرنا ساڵا نوى یا خواندنێ (2020-2021) ل گەل کەنالێ (کوردستان تیڤى) ئەنجامدا.
د دیدارا ناڤهینایدا ڕێزدار سەرۆکێ زانکۆیێ، ب ئاوایەکێ تێر و تەسەل باسێ ڕێکار و چاوانییا دەستپێکرنا ساڵا نوى یا خواندنێ ل سەرتاسەرى هەرێما کوردستانێ و زانکۆیا نەورۆز ب تایبەتى کر. هەروەسا ب ڕەنگەکێ جودا پلان و ستراتیژییا زانکۆیا نەورۆز ژ بۆ بینەر و بیسەرێن کەنالى ئاشکەراکر.
ژ لایەکێ دیتر سەرۆکێ زانکۆیێ، ئاماژە ب پڕۆسێسا دەستپێکرنا دەواما فەرمى ب شێوازێ تێکەل (ئاوێتە) دا، کو ئەڤ شێوازێ خواندنێ ل سەرتاسەرى جیهانێ و ژ لایێ هەمى سازییێن خواندنێ (زانکۆ، پەیمانگەهـ و قوتابخانەیان ...هتد) دهێتەبکارهینان و د جیهانا نویدا ب باشترین شێوە جهێ خوە گرتییە. لەوڕا زانکۆیا نەورۆز ژى دێ ل گوڕەى پلانا خوە ئەڤى سیستەمى ب باشترین شێواز جێبجێ کەت.
د تەوەرەکێ دیتر یێ دیدارێدا پرۆفیسۆرى ئاماژە ب ئەڤێ یەکێ کر، کو ل زانکۆیا نەورۆز دێ ڕێنمایێن ساخلەمییێ ب تەمامى هێنەجێبجێکرن، هەروەسا وانەیێن پڕاکتیکى و هندەک وانەیێن تیۆرییێن سەرەکى ل گەل هەڵسەنگاندن و ئەزموونێن قوتابییان دێ ل ناڤ هۆلێن خواندنێ هێنەکرن.
دکتۆرى ئەڤ چەندە ژى گۆت: بەرماییا وانەیێن دى یێن تیۆرى دێ ب شێوازێ (ئەلکترۆنى) ل دویڤ پرۆگرامێ مۆدل بن و زانکۆ ل دویڤ پێدڤییاتییێ دێ گرنگییێ ب شێوازێ ئۆنلاین دەت.
بۆ زانینا زانیارییێن زێدەتر، تەماشەى دیدارا سەرۆکێ زانکۆیێ بکە