ل ڕۆژا چارشەمبێ ڕێکەفتى (3/2/2021) شاندەکێ زانکۆیا نەورۆز ب سەرۆکایەتییا پرۆفیسۆر دکتۆر (عەبدولوەهاب خالد مووسا) سەرۆکێ زانکۆیا نەورۆز و بەرێزان هاریکارێن سەرۆکێ زانکۆیێ، سەرەدانەکا فەرمى ژ بۆ زانکۆیا کوردستان یا هەولێرێ کرن و ژ لایێ ڕێزدار دکتۆر (هێژا بەدرخان سندى) هاریکارێ سەرۆکێ زانکۆیێ بۆ کاروبارێن ئەکادیمى و ڤەکۆلینان و ئەندامێن جڤاتا زانکۆیێڤە ب گەرمى هاتنە پێشەوازیکرن.
د سەرەدانا خوەدا هەردوو ئالییان ڕوینشتنەکا فەرمى دەربارەى سالا نوییا خواندنێ (2020-2021) سازکرن و ب تێروتەسەلى و ب شێوازەکێ ئەکادیمییانە ئاماژە ب چەندین تەوەرێن گرنگ دان.
ژ لایەکێ دى سەرۆکێ زانکۆیا نەورۆز ب ئاوایەکێ هویربینانە بەحسێ زانکۆیا نەورۆز وەک ئێکەمین زانکۆیا کەرتێ تایبەت ل هەرێما کوردستانێ هاتییە دامەزراندن و نویترین پلان و پێشهاتان کر. ب ئەڤێ چەندێ ژى دەستەیا بڕێڤەبەر یا زانکۆیا کوردستانێ بەختەوەرییا خوە ب پێشکەڤتنا زانکۆیا نەورۆز نيشاندا و ئامادەییا خوە بۆ ب هەڤڕا کارکرنێ د وارێ زانستى و ئەکادیمیدا دەربڕین.
گرنگەبێژین، کو زانکۆیا کوردستان یا هەولێرێ ل سالا 2006ێ هاتییە دامەزراندن و کاروبارێن خوە ل دویڤ سیستەمەکێ ناڤدەولەتى بڕێڤەدبەت.