هێژایان قوتابی، مامۆستا و فهرمانبهرێن زانكۆیا نهورۆز
هیڤیا من باشی و سهلامهتیا وهیه. ب ههلكهفتا دهستپێكرنا ساڵا نوی یا خواندنێ ٢٠٢٠-٢٠٢١، پیرۆزباهیێن گهرم ل وهیێن هێژا دكهم.
نهۆ دگهل دهستپێكرنا ساڵا نوی یا خواندنێ، بهرپرسیاریهكا دی ژی ل سهر ملێن من و مه ههمیانه، كو ئهوژی پاراستنا زانكۆیا نهورۆز، ڤێ ماڵا مه یا جوان و ئهندامێن ڤێ ماڵێیه. جهێ دلخۆشییه كو ئهم ههمی گهلهك ب ئێكودووڤه د گرێدایینه و خهم و نهخۆشیێن ههر ئێك ژ ئهندامێن ڤێ ماڵا مه، نهخۆشی و خهما مه ههمیانه. لهوما، دڤێت بۆ ڤێ ساڵا خواندنێ ل دویڤ تایبهتمهندیا وێ خو ئاماده بكهین و پێكڤه كاروانێ زانستی ب بهردهوامی، سهركهفتن و ب تهندروستی ب رێڤه ببهین. دهلیڤێ بدهن د ڤان خاڵێن ل خوارێ دا هندهك پێزانینان ل دۆر دهستپێكرنا ڤێ ساڵا خواندنێ بدهمه وهیێن هێژا:
• ساڵا خواندنێ ٢٠٢٠-٢٠٢١ ژ رێكهفتی ١-٩-٢٠٢٠ دهستپێكریه و دهواما قوتابیان و وهرگرتنا وانهیان، ٢٧-٩-٢٠٢٠ دێ دهستپێكهت.
• شێوازێ خواندنێ دێ ل دویڤ رێنمایێن وهزارهتا خواندنا باڵا و توێژینهوهی زانستی، شێوازێ تێكهل (Blended) بیت. ب رهنگهكێ كو ب ئهلكترۆنی و ئامادهبوون ل ناڤ زانكۆیێ دێ وانهگوتن بهردهوام بیت.
• رێكارێن خۆپارێزی و تهندروستیێ دێ هێنه بجهكرن و ههمی قوتابی، مامۆستا و فهرمانبهر پابهندن.
• خشتهیێ دهواما ناڤ كهمپسێ دێ وهسا هێته رێكخستن كو كێمترین خرڤهبوون پهیدا ببن.
• ب بهردهوامی كهمپسا زانكۆیێ، هۆڵێن خواندنێ و جهێن هاتووچوو لێ ههین، ل دویڤ رێنماییان هێنه پاككرن و تافیلكرن. تافیلكهرێن دهستان ل گشت ئاڤاهیان دێ هێنه دانان.
• قوتابی، مامۆستا و فهرمانبهرێن نیشان و گۆمانا توشبونێ ل سهر ههبن، بۆ تهندروستیا یێن دی، دێ خۆ كهرهنتینه كهن. پیڤانا گهرماتیا لهشی بۆ ههر كهسهكێ دهێته د كهمپسێ ڤه دێ هێته كرن.
ل دوماهیێ، دووباره ساڵا نوی یا خواندنێ ل وه پیرۆز دكهم و هیڤیا من تهندروستی و سهركهفتنا وه ههمیانه.
دگهل رێزێن من،
برایێ وه
پ. د. عبدالوهاب خالد موسا
سهرۆكێ زانكۆیا نهورۆز