ل رۆژێن ٣١\٨\٢٠٢١ و ١\٩\٢٠٢١ سەرۆکێ زانکۆیا نەورۆز، پرۆفیسۆر د. عەبدولوەهاب خالد مووسا، دو کۆمبوونێن بەرفرەهـ  دگەل فەرمانبەر و مامۆستایێن زانکۆیێ کرن. تێدا، پشتی پیرۆزباهیا سالا نوی یا خواندنێ، نەخشەرێ و ستراتیژیا زانکۆیێ بۆ ڤێ سالێ و یێن د دویڤرا دیارکرن و کرە ئێک ژ تەوەرێن دانوستاندنێ ل گەل پروفیسۆر و دکتۆر و مامۆستایێن نەورۆز. د کۆمبوونان دا، کو هەردو هاریکارێن سەرۆکێن زانکۆیێ ژی د ئامادەبوون، تەکەزی ل وێ ئێکێ هاتەکرن هەمی شیان بهێنە رەخساندن ژ بۆ بلندراگرتنا ناڤێ زانکۆیا نەورۆز، کو جهێ خۆ ل سەر خەریتەیا ئەکادیمیا دنیایێ بکەت. سەرۆکێ زانکۆیێ دیارکر کو زانکۆیێن تایبەت پتر ژ زانکۆیێن حکوومی دەلیڤە هەیە خۆ بیننە پێش ژبەر  فرەبژاردەیێن ل بەردەست و پتر ئازادیا بریاردانێ و و هەبوونا ستافەکێ ئەکادیمی یێ بژارە. هەروەسا جەخت ل سەر تایبەتمەندیێ د کاری دا  و کارکرنا دەزگەهین و پروفیشنال هاتەکرن و مزگینیا بکارئینانا سیستەمێ کارگێریا ئەلکتروونی هاتەدان کو زانکۆیا نەورۆز ئامادەکاری بۆ کرینە و دێ د ئەڤ سالە دا کەڤیتە کاری. دلنیایا جۆری و گرنگیدان ب ڤەکۆلینێن زانستی و مفاوەرگرتن ژ سیستەمێن نوی یێن خواندنێ هندەک ژ تەوەرێن دی یێن ڤان کۆمبوونان بوون. دهێتە زانین، ئەڤ سالە دێ قوتابی ڤەگەرنە ناڤ کەمپۆسا زانکۆیێ و نەورۆزێ ئامادەکاریێن باش بۆ ڤێ ئێکێ کرینە هەر ژ لایێ دورستکرن و نویژەنکرنا ئاڤاهێن زانکۆیێ و زێدەکرنا رووبەرێن کەسکاتیێ و هەتا دگەهیتە ڤەکرنا هندەک بەشێن نوی یێن زانستی پشتی رازەمەندیا وەزارەتا خواندنا بلند و ڤەکۆلینێن زانستی ل سەر دهێتەدان.